Sepan quantos esta carta vieren como nos don Johan, prior de Sancta Maria de Nagera, et cambarero de toda la orden de Cluniego en España, quitamos a vos Pedro Gonzalvez de Pancorvo que non fagades la casa que aviedes de fazer en Sant Lorent de Fuente Burvena por quinjentos maravedis de los blanquiellos de la guerra, que nos diestes et recibiemos de vos para pro del nostro monesterio de Nagera, de los quales maravedis otorgamos que somos de todos bien pagados, que non remanecio dellos niguna cosa por pagar. Et si per aventura nos o otro qual, qui er prior de Nagera, vos demandasse que fiziessedes esta casa sobredicha, que sea tenido de vos dar estos quinjentos maravedis sobredichos et vos que fagades la casa sobredicha assi de como se contiene en la carta del assendamiento que vos tenedes de nos. Et por que esto sea firme et non venga en dubda, damos nos esta carta abierta, scellada com nostro seyello pendient. En testimonio desto son testigos, de monges: Don Pedro Sanchez, prior de claustra, et don Sancho Garcez, sennor de Sancta Colonba. De seglares: don Marnannes yerno del alcade don Bartolome et don Johan Dominguez pelligero et Julian cozinero et yo Martino escrivano de Nagera, qui escrivi esta carta et pusi en ella mi signo (seing), XIX dias de febrero, era de mille et trezientos et diez et siete annos.